2026-jıl 11-12-noyabr kúnleri Beruniy hám Ellikqala rayonlarında ózbek tili páni muǵallimleriniń kásiplik sheberligin arttırıw, bilimlendiriw procesine zamanagóy pedagogikalıq qatnaslardı engiziw maqsetinde kóshpeli seminarlar shólkemlestirildi. Atap aytqanda, 11-noyabr kúni Beruniy rayonı mektepke shekemgi hám mektep bilimlendiriwi bólimine qaraslı 53-sanlı ulıwma bilim beriw mektebinde, 12-noyabr kúni bolsa Ellikqala rayonındaǵı 1-sanlı ulıwma bilim beriw mektebinde Qaraqalpaqstan Respublikası Pedagogikalıq sheberlik orayınıń professor-oqıtıwshıları hám Metodikalıq xızmet kórsetiw bóliminiń metodistleri menen birgelikte “Ózbek tilin oqıtıwda zamanagóy qatnaslar: sapalı bilimlendiriw hám ámeliyat” atamasında kóshpeli seminarlar ótkerildi. Seminardıń tiykarǵı maqseti ózbek tilin oqıtıw sapasın arttırıw, pedagoglardıń kásiplik sheberligin rawajlandırıw, zamanagóy pedagogikalıq qatnaslardı bilimlendiriw procesine engiziw hám aldınǵı tájiriybelerdi en jaydırıwdan ibarat. Seminarda Pedagogikalıq sheberlik orayı Tillerdi oqıtıw metodikası kafedrasınıń aǵa oqıtıwshıları M. Razzakova, M. Urazbaev, Metodikalıq xızmet kórsetiw bóliminiń pán metodistleri U. Matmuratov, T. Jusipbaev hám rayonlıq ulıwma bilim beriw mektepleriniń pán oqıtıwshıları qatnastı. Seminar dawamında úzliksiz kásiplik rawajlanıw sistemasınıń mazmun-mánisi, mámleketlik tildi oqıtıw sapasın arttırıwǵa qaratılǵan tiykarǵı wazıypalar, qánigelik arttırıw kursları aralıǵında pedagoglardıń óz betinshe rawajlanıwı hám óz ara tájiriybe almasıwdıń áhmiyeti haqqında pikir júrgizildi. Seminar juwmaǵında qatnasıwshılar KRK hám KRS ilajların shólkemlestiriw, joybarlı oqıtıw, jańa bahalaw sisteması hámde aldıńǵı pedagogikalıq tájiriybeler boyınsha ózlerin qızıqtırǵan sorawlarǵa qánigelerden tolıq juwap aldı. 
Uqsas jańalıqlar
🎭 SAXNADAǴÍ TURMÍSLÍQ HAQÍYQATLÍR
