“TÚPSIZ TEREŃLIK” — insan qálbiniń eń názik tarların shertken, xalıqaralıq tán alınǵan saxnalıq shıǵarma. 2026-jıl 11-noyabr kúni Berdaq atındaǵı Qaraqalpaq mámleketlik akademiyalıq muzıkalı teatrında Qaraqalpaqstan Respublikası Pedagogikalıq sheberlik orayı tıńlawshıları ushın “Túpsiz tereńlik” draması qoyıp berildi. Raximjan Otarbaevtıń “Nashaqor” shıǵarması tiykarında K.Abibullaev tárepinen qayta islengen, saxnalastırıwshı rejissyor M.Reymov tárepinen saxnaǵa alıp shıǵılǵan bul spektakl tamashagóylerde úlken tásir qaldırdı. Saxnada súwretlengen hár bir obraz, aktyorlardıń shın kewilden hám sheberlik penen atqarıwı, waqıyalardıń tásirsheń talqılawı tamashagóylerdi shıǵarma waqıyalarınıń túbine jetekledi. Spektaklda sáwlelengen insanıylıq kórinisler, turmıs sınaqları hám júrek azapları tamashagóylerdi tereń pikirlewge shaqırdı. Ásirese, ayırım saxnalardıń tásir kúshi sonshelli joqarı boldı, tıńlawshılar kóz jasların tıyıp tura almadı. Teatr insandı tek ǵana tamasha menen emes, al júrekke mórlenetuǵın sezimler, turmıslıq sabaqlar hám tereń oylar menen bayıtadı. Ol insandı ózine, átirapındaǵılarǵa hám ómirge basqasha kózqaras penen qarawǵa shaqıradı. Maǵlıwmat ushın: “Túpsiz tereńlik” draması 2026-jıl 12-16-oktyabr kúnleri Qazaqstan Respublikasınıń Atıraw wálayatında bolıp ótken Rahimjan Otarbaev atındaǵı III Xalıqaralıq teatrlar festivalında qatnasıp, húrmetli I orındı qolǵa kirgizgen. 
🎭 SAXNADAǴÍ TURMÍSLÍQ HAQÍYQATLÍR
Back To Top