BASLAWÍSh KLASS OQÍTÍWShÍLARÍNA JAŃA METODIKALARDÍ ÚYRETIW KASKAD USÍLÍNDA DAWAM ETPEKTE
25-29-avgust kúnleri Mektepke shekemgi hám mektep bilimlendiriw ministrligi, Bilimlendiriwdi rawajlandırıw respublikalıq ilimiy-metodikalıq orayı hám de Qaraqalpaqstan Respublikası pedagoglardı jańa metodikalarǵa úyretiw milliy orayı menen birgelikte respublikamızdaǵı baslawısh klass oqıtıwshıların jańa metodikalarǵa úyretiw maqsetinde kaskad usılında «Baslawısh klasslarda oqıtıwdıń zamanagóy metodikası» atamasında seminar-trening ótkerilmekte.
Seminardıń tiykarǵı maqseti baslawısh klass oqıtıwshılarınıń kásiplik sheberliklerin rawajlandırıwdan ibarat.
Zamanagóy bilimlendiriw dúnyadaǵı ózgerislerge beyimlesiwsheń, hár qıylı mashqala hám tosqınlıqlarǵa tayar turatuǵın professionallardıń jańa áwladın qáliplestirmekte. Bunday bilimlendiriw oqıwshılardı tek ámeliy kónlikpeler menen emes, al oqıwshılarǵa búgingi kúnde zárúr bolǵan zamanagóy kompetenciyalardı rawajlandırıwǵa járdem beretuǵın oqıw texnikaları menen támiyinleydi.
Zamanagóy bilim beriw búgingi kúndegi oqıwshılarǵaː
Kompleks wazıypalardı sheshiw.
Bilimler logika, talqılaw, sáwbetlesiwde kritikalıq pikirlew, pikirdi juwmaqlaw arqalı sheshimin qabıl etiw.
Dóretiwshilik pikirlew.
Adamlar menen birge islesiw.
Jámáátte islew.
Óziniń hám basqalardıń emociyaların (kewil-keshirmelerin) durıs bahalaw, olardı basqarıw, emocional intelektke iye bolıw.
Dıqqattı bir wazıypadan basqasına tez qarata alıw, biyimlesiwsheń bolıwdı úyretedi. Bunıń ushın bilimlendiriw procesinde 4«K» modelin qollanıw kerek. 4 «K» modeli oqıwshılarda tómendegilerdi qáliplestiredi.
Kritikalıq (sın) pikirlew.
Kreativlik (dóretiwshilik qatnas).
Kommunikaciya.
Kooperaciya.
Baslawısh klasslardıń jańa sabaqlıqları usı 4«K» modeli tiykarında tayarlanǵan.
