Ónermenttiń másláhátleri tıńlandı
Qaraqalpaqstan Respublikası Pedagoglardı jańa metodikalarǵa úyretiw milliy orayında «Ámeliy pánler hám mektepten tısqarı bilimlendiriw metodikası» kafedrası tárepinen «On barmaǵım ónerli» atamasında ónerment Maxada Allambergenova menen ushırasıw keshesi shólkemlestirildi.
Onda oraydıń professor-oqıtıwshıları, súwretlew óneri hám sızıw kursındaǵı tıńlawshılar, ámeliy pánler hám mektepten tısqarı bilimlendiriw metodikası kafedrası aǵzaları qatnastı.
Ushırasıw keshesinde Ámeliy pánler hám mektepten tısqarı tálim metodikası kafedrasınıń baslıǵı R.Abdullaev, oraydıń Hayal–qızlar keńesiniń baslıǵı P.Salieva, kafedra docenti G.Smaylovalar shıǵıp sóylep, mektep oqıwshıların xalıq ónermentshiligi kásiplerine baǵdarlaw, olardıń ónermentshilikke bolǵan qızıǵıwshılıǵın qáliplestiriw baǵdarında islenip atırǵan jumıslar tuwralı maǵlıwmatlar berilip, xalıq ónermentshiliginiń milliy qádiriyatlarımızdıń tiykarǵı baǵdarı ekenligi atap ótildi hám pikir-usınıslar bildirildi.
Atap ótilgenindey, 2022-2026-jıllarǵa mólsherlengen Jańa Ózbekstannıń rawajlanıw strategiyasında bilimlendiriwdiń sapasın arttırıwda qoyılatuǵın bir qansha talaplar bar. Solardıń qatarında bilimlendiriwdiń sapasın arttırıw – Jańa Ózbekstandı rawajlandırıwdıń birden-bir durıs jolı ekenligin atap ótiwimizge boladı.
Qábiletli jaslardı qollap-quwatlawda bilimlendiriw tarawındaǵı gezektegi áhmiyetli baǵdar, bul – jaslardıń zamanagóy kásip-óner iyelewi ushın barlıq zárúr sharayatlardı jaratıwdan ibarat.
Milliy mádeniyat hám kórkem óner pútkil tarıyxıy ótmish dawamında úlken áhmiyetke iye bolıp kelgen. Onda xalıqtıń tariyxı, basqa xalıqlar menen etnomádeniy baylanısları, estetikalıq normaları sáwlelengen. Házirgi waqıtta dástúriy milliy kórkem ónerdi, sonıń ishinde, kesteshilik, toqımashılıq, quwırshaq tigiw h.t.b. ónermentshilik jumısları háwij almaqta.
Ata – babalarımızdıń mádeniy miyraslarınıń bizge jetip keliwinde bir qansha ilimpazlarımızdıń miynetleri bar. Olardıń izertlewlerinde qaraqalpaqlardıń milliy kiyimleri, bezeniw buyımları, úy-ruwzıgershiliginde qollanılatuǵın buyımlar sóz etilgen. Qaraqalpaq milliy kiyimlerinde de bezewshilik – ámeliy kórkem ónerimizdiń oǵada bay dástúrleri jámlengen bolıp, olar xalqımızdıń estetikalıq túsinikleri menen talǵamların sáwlelendiredi, ruwxıy hám tarıyxıy tájiriybelerdiń áwladtan – áwladqa jetip keliwin támiyinleydi.
Ónermentshilik jaslarda kórkem ámeliy ónerdi hám ádep-ikramlılıqtı rawajlandırıwǵa xızmet etedi. Xalıq dóretpesi jaslar tárbiyasında úlken orın iyeleydi.
Ushırasıwda qatnasıwshılardıń da pikir-usınısları tıńlanıp, olar qánigelerden ózlerin qızıqtırǵan sorawlarǵa juwap aldı.
