Korrupciyaǵa qarsı gúres – jarqın keleshegimiz tiykarı

Qaraqalpaqstan Respublikası Pedagogikalıq sheberlik orayında bilimlendiriw tarawında korrupciya jaǵdaylarına qarsı gúresiw hám olardıń aldın alıw máselelerine baǵıshlanǵan “Korrupciyaǵa qarsı gúresiw – jarqın keleshegimizdiń tiykarı” atamasında ushırasıw bolıp ótti. Ilajda Nókis qalalıq Yuridikalıq xızmet kórsetiw orayınıń baslıǵı T. Utemuratov, Ózbekstan “Adolat” SDP Qaraqalpaqstan Respublikası Keńesi baslıǵınıń orınbasarı Sh. Tóreshova, oraydıń kafedra baslıqları, professor-oqıtıwshılar hám tıńlawshılar qatnastı. Ushırasıwdı oraydıń “Sociallıq-ekonomikalıq pánler metodikası” kafedrası baslıǵı, t.i.k., docent R.Bauetdinov alıp bardı. Atap ótilgenindey, korrupciya jámiettiń rawajlanıwına úlken tosqınlıq etetuǵın illetlerden biri bolıp esaplanadı. Mámleketimizde korrupciyaǵa qarsı gúresiw, onıń aldın alıw hám bul baǵdardaǵı nızamshılıq bazasın jetilistiriwge ayrıqsha itibar qaratılmaqta.   Ilaj dawamında dámegóylik, para alıw hám beriw, sonday-aq, sawǵa ornına puqaralardıń huqıqları menen máplerine qayshı háreket etiw ámeldegi nızamshılıqqa muwapıq qadaǵan etiletuǵını, bunday jaǵdaylar anıqlanǵanda bolsa jınayıy juwapkershilikke sebep bolatuǵını anıq mısallar arqalı túsindirildi. Sonday-aq, túrli tarawlarda korrupciyaǵa qarsı gúresiw boyınsha ámelge asırılıp atırǵan huqıqıy hám operativ ilajlarǵa baǵıshlanǵan videorolik kórsetildi.