2026-jıl 30-31-oktyabr kúnleri Beruniy rayonındaǵı 36-sanlı ulıwma orta bilim beriw mektebinde UNICEF, Google for Education hám STEM Solution birgelikte ISHONCH 2030 joybarı sheńberinde “Google bilimlendiriw quralları arqalı sanlı inklyuziya hám hámme ushın qolaylı bilimlendiriw” temasında ámeliy trening shólkemlestirildi. Treningte Qaraqalpaqstan Respublikası Pedagogikalıq sheberlik orayı Anıq hám tábiyıy pánler metodikası kafedrası aǵa oqıtıwshısı Dilfuza Qutlımuratova hám Metodikalıq xızmet kórsetiw bólimi metodisti Abdikadir Bayniyazov trener sıpatında qatnastı. Sabaqlar dawamında pedagoglar Chromebook qurılmalarınan paydalanıw, Google Workspace for Education platforması imkaniyatları, Gemini jasalma intellekt quralları hám inklyuziv bilimlendiriwdi qollap-quwatlawshı sanlı sheshimler menen jaqınnan tanısıp, ámeliy kónlikpelerin bekkemledi. Treningtiń ámeliy bóliminde qatnasıwshılar zamanagóy sanlı qurallardan paydalanıw, oqıwshılardıń individual talapların esapqa alǵan halda bilimlendiriw procesin shólkemlestiriw boyınsha tapsırmalardı orınladı.
