AYMAQLARDA MOBIL METODIKALÍQ TOPARLAR JUMÍSÍ: PEDAGOGLAR USHÍN ÁMELIY SEMINARLAR

Qaraqalpaqstan Respublikası Pedagogikalıq sheberlik orayı Metodikalıq xızmet kórsetiw bólimi metodistleri tárepinen aymaqlardaǵı ulıwma bilim beriw mekteplerinde pedagoglardıń kásiplik sheberligin arttırıw, aldınǵı tájiriybelerdi en jaydırıw hám zamanagóy bilimlendiriw kózqarasların ámeliyatqa engiziwge qaratılǵan metodikalıq seminarlar shólkemlestirilmekte. 2026-jıl 5-6-noyabr kúnleri Taxtakópir hám Tórtkúl rayonlarındaǵı ulıwma bilim beriw mekteplerinde mobil metodikalıq toparlar sheńberinde oqıw-ámeliy seminarlar ótkerildi. Atap aytqanda, Taxtakópir rayonındaǵı 4-, 9 hám 21-sanlı mektepler, Tórtkúl rayonındaǵı 41 hám 49-sanlı ulıwma bilim beriw mektepleriniń oqıtıwshıları qatnasıwında shólkemlestirilgen seminarlarda tómendegi áhmiyetli temalar qamtıp alındı: 🔹 Oqıwshılarda XXI ásir kónlikpelerin qáliplestiriw — sın kózqarastan pikirlew, dóretiwshilik, kommunikativlik qarım-qatnas , jámáátte birge islew hám mashqalalardı sheshiw kónlikpelerin rawajlandırıw; 🔹 Pedagoglardıń aldıńǵı is tájiriybelerin anıqlaw hám en jaydırıw — nátiyjeli metod hám pedagogikalıq jantasıwlardı úyreniw hám de bilim beriw procesine engiziw; 🔹 Oqıwshılardıń sóylew kompetenciyaların bahalaw hám monitoring yetiw — oqıwshılardıń sóylew rawajlanıwın baqlaw hám bahalawdıń nátiyjeli usılları; 🔹 Bilim beriw procesinde jasalma intellekt texnologiyalarınan paydalanıw — zamanagóy sanlı imkaniyatlardı sabaq procesine engiziw. Sonday-aq, seminarlar dawamında jańa áwlad sabaqlıqlarınıń mazmun-mánisi, zamanagóy bilimlendiriw talapları, dástúriy emes hám interaktiv metodlardan paydalanıw boyınsha ámeliy usınıslar berildi. Ilajlar juwmaǵında pedagoglar óz ara tájiriybe almasıp, sabaqlardı mazmunlı, qızıqlı hám nátiyjeli shólkemlestiriw boyınsha jańa bilim hám ámeliy kónlikpelerge iye boldı.