Qaraqalpaqstan Respublikası Pedagoglardı jańa metodikalarǵa úyretiw milliy orayında Ózbekstan Respublikası Prezidentiniń 2023-jıl 11-centyabrdegi “Ózbekstan – 2030” strategiyası haqqında”ǵı pármanınıń mazmun-mánisin professor-oqıtıwshılarǵa túsindiriwge baǵıshlanǵan ilaj bolıp ótti.
Ilaj dawamında «Social-ekonomikalıq pánler metodikası» kafedrasınıń aǵa oqıtıwshısı Nurjamal Tlewmuratova tárepinen bunday uzaq múddetli strategiya xalıqtı hár tárepleme ruwxlandırıw, olardıń mámleketke degen isenimin arttırıw ushın ullı bir shaqırıq bas ideya ekenligin aytıp ótti. Hár qanday mámleket óziniń jedel túrde alǵa qaray ilgerilewi, dúnyanıń rawajlanǵan mámleketleri qatarınan múnásip orın iyelewi, xalqınıń turmıs sharayatın jaqsılawı ushın uzaq múddetke mólsherlengen Strategiyasın islep shıǵadı. “Ózbekstan – 2030” strategiyası 5 baslı baǵdar hám de 100 maqsetten ibarat. «Ózbekstan – 2030» strategiyası bir qatar joqarı ideyalardı ózinde jámlep, Jańa Ózbekstandı qurıwǵa qaratılıp, onıń sheńberinde ulıwma bahası 252,2 milliard dollarlıq ilajlar názerde tutılǵan. «Ózbekstan – 2030» strategiyasınıń 1-baǵdarı «Hár bir insanǵa óz potencialın ámelge asırıwı ushın múnásip sharayatlar jaratıw», dep atalıp, ol 44 maqsetten ibarat. Onda tiykarınan bilimlendiriw sisteması, xalıqtıń salamatlıǵın támiyinlew, sociallıq xızmetlerdi kórsetiw hám kámbaǵallıqtı qısqartıw, jaslarǵa baylanıslı mámleketlik siyasat hám sport baǵdarları, ruwxıy rawajlanıwdı támiyinlew hám mádeniyat tarawın jańa basqıshqa alıp shıǵıw boyınsha reformalar belgilengen.
Onda, mektepke shekemgi bilimlendiriw sistemasın jańa basqıshqa alıp shıǵıw hám balalardıń tolıq qamtıp alınıwın támiyinlewde, balalardı bilimlendiriw hám tayarlaw toparları menen qamtıp alıwdıń dárejesin 100 procentke jetkeriw, mámleketlik emes mektepke shekemgi bilimlendiriw shólkemleriniń sanın 56 mıńǵa jetkeriw, barlıq mámleketlik mektepke shekemgi bilimlendiriw shólkemlerin kompyuter klası menen támiyinlew, mektepke shekemgi bilimlendiriw shólkemlerin 100 procent taza ishimlik suwı hám zamanagóy sanitariyalıq-gigienalıq infrastruktura menen támiyinlew. Sonday-aq, eki mıń baqsha shólkemlestiriw wazıypaları qoyılǵan.
Ulıwma orta bilim beriw sistemasında «Bilimlendiriw ushın qolaylı ortalıq» baǵdarlamasın ámelge asırıw maqsetinde, oqıw orınlarınıń sanın 7,5 millionǵa shekem jetkeriw, ulıwma orta bilim beriw mákemelerin 100 procent taza ishimlik suwı hám zamanagóy sanitariyalıq-gigienalıq infrastruktura menen tolıq támiyinlew, 2,5 million oqıwshı ornına iye mekteplerdi qurıwǵa 8 milliard dollar ajıratıw belgilenip, ulıwma orta bilim beriw sistemasın jańa basqıshqa alıp shıǵıwda 699 atamadaǵı jańa sabaqlıqlar, oqıw dápterleri, muǵallimler ushın metodikalıq qollanbalar hám mobil qosımshalardı jaratıw, jańa áwlad sabaqlıqları tiykarında planshetler ushın 1000 multimedia qosımshalar jaratıw, 208 «Uqıp – Umtılıw – Keleshek» atamasındaǵı mektep-internatların shólkemlestiriw, bilimlendiriw shólkemlerine hár jılı 500 «til iyeleri» bolǵan sırt el qánigelerin tartıw wazıypaları rejelestirilgen. Bilimlendiriw tarawında, pedagog xızmetkerlerdiń miynet haqısın eki esege arttırıw, alıs hám shetki aymaqlarda jaylasqan 715 ulıwma orta bilim beriw mákemeleriniń oqıwshıları ushın biypul mektep avtobusların jolǵa qoyıw, ulıwma orta bilim beriwdi rawajlandırıw jumıslarına jeke sektordı keńnen tartıw, mámleketlik emes ulıwma orta bilim beriw shólkemleriniń sanın 1000 ǵa jetkeriw, mámleketlik emes ulıwma orta bilim beriw shólkemleriniń jumısların jolǵa qoyıw ushın 1 trillion sum muǵdarında jeńilletilgen kreditler ajıratıw, mámleketlik emes ulıwma orta bilim beriw shólkemlerinde oqıp atırǵan oqıwshılardıń sanın 3 esege arttırıw, mámleketlik-jeke menshik sheriklik sheńberinde 2 milliard dollarlıq ulıwma orta bilim beriw shólkemleri tarmaǵın keńeytiw joybarların ámelge asırıw maqsetleri belgilengen.
Professional bilimlendiriw sistemasın rawajlandırıw arqalı oqıwshılardıń zamanagóy bilim hám kónlikpelerge iye bolıwı ushın qosımsha 146 kásip hám qánigeliklerge biypul oqıtıwdı jolǵa qoyıw, 704 professional bilimlendiriw mákemelerinde bilimlendiriwdiń sapasın arttırıw hám materiallıq-texnikalıq bazasın jetilistiriwge 3 trillion sum ajıratıw, sonday-aq, orta buwın qánigelerin tayarlawda mámleketlik granttı injenerlik, óndirislik hám qayta islew baǵdarlarında 50 procentke, informaciya texnologiyaları, qurılıs, transport hám logistika baǵdarlarında 100 procentke jetkeriw rejelestirilgen.
