Bilimlendiriwdiń sapası joqarı bolmaǵan mektep basshılarına seminar ótkerilmekte

Ózbekstan Respublikası Ministrler Kabinetiniń 2021-jıl 15-oktyabrdegi 646-sanlı qararı tiykarında hár jılı mart ayında arnawlı bahalaw kriteriyaları menen ulıwma bilim beriw mektepleri bahalanıp, bilimlendiriwdiń sapası joqarı bolmaǵan mektepler dizimi járiyalanıp kelinbekte. Usı bahalaw kriteriyasında pitkeriwshilerdiń joqarı oqıw orınlarına oqıwǵa qabıl etiliwi, mekteptiń reytingi, pedagog kadrlardıń sapa quramı, pán olimpiadalarına oqıwshılarınıń qatnasıwı sıyaqlı zamanagóy mekteplerge qoyılǵan talaplar tiykarında 700 den aslam mekteptiń nátiyjeleri bahalanǵan. Bahalaw juwmaǵında 2024-2025-oqıw jılı ushın respublikamız boyınsha 29 ulıwma bilim beriw mektebi «Bilimlendiriwdiń sapası joqarı bolmaǵan mektepler» qatarına kirgizildi. Usı mektep direktorları, direktordıń oqıw isleri boyınsha orınbasarları, direktordıń ruwxıy-aǵartıwshılıq isleri boyınsha orınbasarlarına 27-avgust kúni Pedagogikalıq sheberlik orayında Qaraqalpaqstan Respublikası Mektepke shekemgi hám mektep bilimlendiriwi ministrligi hám Pedagogikalıq sheberlik orayı menen birgelikte «Bilimlendiriwdiń sapası joqarı bolmaǵan mektep basshıları ushın 2024-2025-oqıw jılında bilimlendiriwdiń sapasın arttırıwǵa qaratılǵan ilajlar» atamasındaǵı oqıw-seminar shólkemlestirildi. Oqıw-seminarda trenerler tárepinen «Bilimlendiriwdiń sapası joqarı bolmaǵan mektep» direktorları hám olardıń orınbasarları sapalı basqarıw, ámeldegi oqıw-reje hám variativ oqıw-reje, bilimlendiriwdiń sapası joqarı bolmaǵan mektepler dizimin anıqlawdaǵı bahalaw kriteriyaları, pedagoglarda zamanagóy sabaqlardı shólkemlestiriwdegi kónlikpelerin rawajlandırıw, ulıwma bilim beriw mekteplerinde klasslardı komplektlew hám tarifikaciya dizimlerin qáliplestiriw tártibi, salamat ortalıq jaratıw baǵdarlarındaǵı jumıslar boyınsha bir qatar ámeliy hám metodikalıq jaqtan túsinikler berildi. Bul seminarda usı mektep direktorlarınıń ruwxıylıq hám aǵartıwshılıq isleri boyınsha orınbasarlarına Metodikalıq xızmet kórsetiw metodistleri I.Allaniyazova hám M.Palwanovalar tárepinen “Salamat ortalıq-jetiskenlikler girewi” temasında sheberlik sabaqları da ótkerildi. Mektepke shekemgi hám mektep bilimlendiriwi ministrligi tárepinen bekitilgen trenerler bilimlendiriwdiń sapası joqarı bolmaǵan mektepler dizimin anıqlawdaǵı ámeldegi kriteriya haqqında túsinikler berdi. Seminarda qatnasıwshılar ózlerin qızıqtırǵan sorawlarǵa juwap aldı.