1989-jıldıń 1-dekabrinde qaraqalpaq tiline Mámleketlik til biyligi berilgen edi. Mine bul sánege bıyıl 35 jıl tolmaqta. Usı múnásibet penen respublikamızdıń barlıq aymaqlarında, mákeme hám shólkemlerde bayram kesheleri ótkerilmekte.
Qaraqalpaqstan Respublikası Pedagogikalıq sheberlik orayında «Mártebeń bálent bolsın-Ana tilim!» atamasındaǵı bayram keshesi bolıp ótti.
Oǵan Pedagogikalıq oraydıń professor-oqıtıwshıları, tıńlawshılar hám ǵalaba xabar qurallarınıń wákilleri qatnastı.
Ilaj Ózbekstan hám Qaraqalpaqstan Respublikalarınıń mámleketlik gimnleri menen baslandı.
Onda Qaraqalpaqstan Respublikası Pedagogikalıq sheberlik orayı direktorı V.Bekmuratova, «Tillerdi oqıtıw metodikası» kafedrası baslıǵı, f.i.k. S.Matekeev, kаfеdrаsı dоcеnti B.Turımbetov, Mámlеkеtlik (qаrаqаlpаq) til kursı tıńlаwshısı
G. Berdimuratovalar ilaj qatnasıwshıların qaraqalpaq tiline mámleketlik til biyligi berilgen kún bayramı menen qutlıqlap, ana tilimizdiń xalqımız turmısı hám jámiyetimizdiń rawajlanıwı jolında tutqan ornı menen áhmiyetine toqtap ótti.
Atap ótilgenindey, til – bul eń ullı qádriyat esaplanadı. Tilsiz – insan hesh kim emes. Dúnyada hár qıylı tiller bar. Insan ómirinde tildiń áhmiyeti oǵada úlken. Til menen ózimizdiń pikirlerimizdi erkin bildire alamız. Hár bir millettiń óziniń ana tili boladı. Biziń ana tilimiz ¬ qaraqalpaq tili. Xalıq awızeki dóretpeleri, shayır-jazıwshılardıń kóplegen shıǵarmaları arqalı da ana tilimizdiń bay sózlik qorına iye ekenligin kóremiz.
Bayram keshesi tıńlawshılar tárepinen tayarlanǵan ádebiy-kompoziciyası menen kóterińki ruwxta dawam etti.
