Búgin 9-aprel kúni Pedagogikalıq sheberlik oraydıń «Tillerdi oqıtıw metodikası» kafedrası aǵa oqıtıwshısı Gulistan Qanaatovanıń Qazaq tili hám ádebiyatı páni oqıtıwshıları úzliksiz kásiplik rawajlandırıw kursında «Materiallıq-súwretli-simvollıq (MSS) qatnastı qollanıw» temasında ashıq sabaǵı bolıp ótti.
Materiallıq-súwretli-simvollıq jantasıw: quramalı túsiniklerdi kórgizbelilik arqalı túsindiriwdiń nátiyjeli usılı. Bul usıl oqıwshılardıń qabıllawın jeńillestirip, maǵlıwmattı eslep qalıwın arttıradı. Bilim alıwshılardıń biliw belsendiligin arttırıwda, turmıslıq kónlikpelerin qáliplestiriwde hám teoriyalıq bilimdi ámeliy iskerlik penen baylanıstırıwda MSC qatnastıń áhmiyeti úlken.
Ashıq sabaq dawamında muǵallimler MSS qatnasınıń metodikalıq tiykarları menen tanısıp, onı qazaq tili hám ádebiyatı sabaqlarında qollanıwdıń nátiyjeli jolların kórip shıqtı. Quramalı túsiniklerdi kórgizbeli qurallar, súwretler, sxemalar hám shártli belgiler arqalı túsindiriw arqalı oqıwshılardıń pánge qızıǵıwshılıǵı hám túsiniw dárejesin arttırıw múmkin ekenligi ámeliyatta dálillendi.
Materiallıq-súwretli-belgili qatnastı qazaq tili hám ádebiyatı sabaqlarında qollanıw – bilimlendiriwdiń sapasın arttırıw, oqıtıw procesin jedellestiriw hám bilim alıwshılardıń funkcionallıq sawatlılıǵın qáliplestiriwdiń áhmiyetli faktorı sıpatında qaralmaqta.
Búgingi ashıq sabaq dawamında qatnasıwshılar bul metodtıń nátiyjeliligin ámelde tájiriybeden ótkerip, onı oqıw procesine engiziw zárúrligin túsindi.
