2026 jıl 16-yanvar kúni Ózbekstan kórkem óner akademiyasınıń Qaraqalpaqstan Respublikası bólimi Kórgizbe sarayında Ózbekstan hám Qaraqalpaqstan xalıq xudojnigi, Ózbekstan kórkem óner akademiyasınıń haqıyqıy aǵzası Sarsenbay Baybosinovtıń «Íǵbal» atamasındaǵı jeke kórgizbesiniń ashılıwı hám jaqında baspadan shıqqan xudojnik dóretiwshiligine arnalǵan albom-katalogtıń prezentaciyası bolıp ótti. Bul mádeniy-aǵartıwshılıq ilajǵa Qaraqalpaqstan Respublikası Pedagogikalıq sheberlik orayı Ámeliy pánler hám mektepten tısqarı tálim metodikası kafedrasınıń baslıǵı G.Smaylova hám “Súwretlew kórkem óneri hám sızıw” kursınıń tıńlawshıları belsene qatnastı. Kórgizbede avtordıń 300 den aslam sońǵı jıllarda dóretken kórkem miynetleri tamashagóyler názerine usınıldı. Ekspoziciya etyud, peyzaj, portret, natyurmort hám basqa janrlardaǵı shıǵarmalardan ibarat bolıp, milliy dástúrler menen zamanagóy kórkem oydıń úylesimin kórsetiwge baǵdarlanǵan. Ilaj sheńberinde tanıstırılǵan albom-katalog Sarsenbay Baybosinovtıń dóretiwshilik jolın qamtıp, onıń kórkem stili, filosofiyalıq oylawı hám puantilizm usılındaǵı ózgesheliklerin ashıp beredi. Basılımda avtordıń tańlanǵan shıǵarmaları orın alǵan bolıp, bul baspa xudojniktiń dóretiwshiligin úyreniw hám násiyatlawda áhmiyetli derek bolıp esaplanadı. Kórgizbe kurs tıńlawshılarda úlken estetikalıq tásir qaldırdı. 
Kórgizbe Íǵbal
Back To Top