“El-yurt umidi” qorı sırt elde oqıw ushın imkaniyatlar esigin ashpaqta

“El-yurt umidi” qorınıń 2023-jılǵı 2-ashıq stipendiya tańlawı tártibi menen baylanıslı jańalıqlardı Qaraqalpaqstan Respublikasındaǵı mámleketlik xızmetkerler hám jaslarǵa túsindiriw maqsetinde onlayn seminar ótkerildi.\ Seminarǵa mámleketlik uyım hám shólkemlerdiń xızmetkerleri, Qaraqalpaqstan Respublikası pedagoglardı jańa metodikalarǵa úyretiw milliy orayınıń tıńlawshıları, joqarı oqıw orınlarınıń studentleri, magistrantlar, ilimiy izleniwshiler, Prezident mektebi, qánigelestirilgen hám ulıwma bilim beriw mektepleriniń pitkeriwshi klass oqıwshıları, qatnastı. Maqset — talantlardı izlep tabıw, olardıń sırt eldegi abıroylı bilimlendiriw hám ilimiy oqıw orınlarında tálim alıwın shólkemlestiriwge kómeklesiw, professional jańa áwlad kadrların qáliplestiriw hám olardı mámleketlik xızmetke tartıwdan ibarat. Ashıq sáwbetlesiw formasında ótkerilgen seminarda “El-yurt umidi” qorı tárepinen járiyalanǵan tańlawlarda jeńimpaz bolıp, házirgi kúnde sırt elde oqıp atırǵan hám de pitkerip kelip jumıs islep atırǵan Qaraqalpaqstanlı stipendiantlar da qatnastı, ózleriniń tájriybeleri, sırt elde oqıw processleri, imkaniyatlar haqqında óz pikirlerin bildirdi. Seminar qatnasıwshıları ózlerin qızıqtırǵan bárshe sorawlarına juwaplar aldı.