«Social-ekonomikalıq pánler metodikası» kafedrası baslıǵı Rawaj Bawetdinov tárepinen «Pedagogtıń XXI ásir kónlikpesi» joybarı tiykarında «Durıs-nadurıs metodı» temasında seminar-trening ótkerildi.
Seminardıń maqseti – hár qanday maǵlıwmattıń durıs yamasa nadurıslıǵın analizlew hám bahalaw arqalı sınlı pikirlewdi rawajlandırıw usılı, maǵlıwmattı sın kóz-qarastan túsiniw hám durıs yamasa nadurıslıǵın analizlew kónlikpelerin rawajlandırıw, hám professor-oqıtıwshıları menen óz-ara pikir almasıwdan ibarat.
Metodtı paydalanıw usılıː
1.Temaǵa baylanıslı durıs hám nadurıs maǵlıwmatlar dizimin qáliplestiriń.
2. Oqıwshılarǵa maǵlıwmatlardı oqıp beriń hám kórsetiń. Hár bir maǵlıwmattıń durıs yamasa nadurıslıǵın dápterlerine belgilewin sorań,
Mısalı: 1. Durıs. 2. Nadurıs. 3. Durıs.
3. Sabaqtıń teoriyalıq bólimin ótkeriw,
4. Oqıwshılar tema boyınsha túsinik alǵannan soń maǵlıwmatlarǵa qaytıń, hár bir maǵlıwmattı kórip shıǵıń hám oqıwshılardıń juwapları ne ushın «durıs» yamasa «nadurıs» dep belgilew sebeplerin talqılań.
Túsiniw qıyın bolǵan gáplerdi taxtaǵa jazıw yamasa proektor arqalı kórsetiliwi kerek.
Maǵlıwmatlar “durıs” yamasa «nadurıs» dep bahalanıwı ushın qandayda bir tiykar bolıwı kerek.
Oqıwshılar berilgen maǵlıwmatlar boyınsha óz pikirlerin erkin bayan etiwlerin támiyinlew hám olardıń dáliyllerin, hátteki olar nadurıs bolsa da, óz pikirlerin túsindiriwge tayar bolıwın xoshametleń.
Diskussiya waqtında tek ǵana eń kóp jol qoyılǵan qáteliklerdi kórip shıǵıń.
Keńeytirilgen halda paydalanıw
Oqıwshılarǵa internettegi qáteler barlıǵın biletuǵın maqalalardı usınıs etiń hám olardı usı maqalalardaǵı nadurıs maǵlıwmatlardı tabıwǵa shaqırıń.
Ámeliy izertlew xızmetinde olardı ózińiz qáliplestiriń yamasa oqıwshılardan izertlew, tájiriybe hám t.b lar nátiyjesinde neler bolıw múmkinligin sorań.
Bul texnikanı pánleraralıq sabaqlarda qollanıw qızıqlı bolıwı múmkin.
