Usı jıldıń 16-may kúni Qaraqalpaqstan Respublikası pedagoglardı jańa metodikalarǵa úyretiw milliy orayında «Pedagoglardıń bilimin jetilistiriw-dáwir talabı» atamasında baspasóz konferenciyası bolıp ótti. Oǵan Qaraqalpaqstan Respublikası pedagoglardı jańa metodikalarǵa úyretiw milliy orayı direktorı, Oqıw hám metodikalıq isler boyınsha direktor orınbasarı, kafedra baslıqları, bólim basshıları hám ǵalaba xabar qurallarınıń wákilleri qatnastı. 
Baspasóz konferenciyasında ǵalaba xabar quralları wákillerine Pedagogikalıq orayı direktorı B.Dilanov hám Okıw hám metodikalıq isler boyınsha I.Pirniyazov sózge shıǵıp, Pedagogikalıq orayda pedagoglardıń bilimin jetilistiriw boyınsha amelge asırılıp atırgan jumıslar, «Jańa Ózbekstannıń 2022-2026jıllarǵa mólsherlengen Rawajlanıw strategiyası, 2024-jıl “Jaslar hám biznesti qollap-quwatlaw jılı” mámleketlik baǵdarlamasında belgilengen wazıypalardıń orınlanıw barısı haqqında maǵlıwmatlar berildi. Ózbekstan Respublikası Mektepke shekemgi hám mektep bilimlendiriw ministriniń 2023-jıl 28-dekabrdegi «Mektepke shekemgi hám mektep bilimlendiriw sistemasındaǵı bilimlendiriw shólkemleri basshı, qánige hám pedagog kadrlardıń 2024-jıl ushın qánigeligin arttırıw kurslarında oqıtıw jobasın tastıyıqlaw haqqında»ǵı 577-sanlı buyrıǵı tiykarında 2024-jıl Pedagogikalıq orayda qánigeligin arttırıw kurslarınıń jobası tastıyıqlandı. Qaraqalpaqstan Respublikasındaǵı mekteplerde xızmet etip atırǵan jámi 36 498 pedagog, sonnan 32 917 mektep muǵallimleri, 3 581 basshı hám qánigeler qánigeligin arttırıwı belgilengen. Usı jılda 27 462 pedagog Pedagoikalıq orayda dástúriy formada qánigeligin arttırıwı jobalastırılǵan bolsa, sonnan, 13 511 pedagog 3-dárejedegi, 13 951 pedagog 4-dárejedegi oqıw baǵdarlaması tiykarında oqıtılıwı belgilengen. 9 036 pedagog 1, 2-dárejedegi oqıw baǵdarlamaları tiykarında arnawlı platforma arqalı onlayn túrinde oqıwı rejelestirilgen. 
Pedagogikalıq oray professor-oqıtıwshıları tárepinen 2023-jılda bilimlendiriwdiń sapası hám nátiyjeliligin arttırıw maqsetinde 2 sabaqlıq, 6 oqıw qollanba, 3 oqıw-metodikalıq qollanba, 41 metodikalıq qollanba, 62 metodikalıq usınıslar tayarlandı. Shet el jurnallarında 33 maqala, JAK dizimindegi Respublika ilimiy jurnallarında 33 maqala, xalıqaralıq konferenciyalarda 85 maqala tezisi, Respublika kóleminde ótkerilgen ilimiy-ámeliy konferenciyalarda 43 maqala tezisleri járiyalandı. 2024-jıldıń ótken 4 ayı dawamında pedagogikalıq oray professor-oqıtıwshıları tárepinen 3 monografiya, 1 oqıw qollanba, 5 metodikalıq qollanba, 8 metodikalıq usınıs tayarlandı. Shet el jurnallarında 6 maqala, JAK dizimindegi Respublika ilimiy jurnallarında 6 maqala, xalıqaralıq konferenciyalarda 10 maqala tezisi, Respublika kóleminde ótkerilgen ilimiy-ámeliy konferenciyalarda 8 maqala tezisleri járiyalandı. Búgingi kúnde Pedagogikalıq oraydıń Málimleme-resurs orayı fondında 15 838 oqıw ádebiyatları bar. Solardan 15 483 danası kórkem ádebiyatlar, 500 den aslam elektron kitaplar, 335 danası metodikalıq qollanbalar, esaplanadı. 
Pedagogikalıq oraydıń professor-oqıtıwshıları tárepinen tayarlanǵan oqıw hám metodikalıq qollanbalar qaǵaz jáne elektron variantta málimleme-resurs orayına tapsırılǵan. Tıńlawshılar bul materiallardan ózleriniń bilimlerin jetilistiriw ushın paydalanıp kiyatır. Sonday-aq, barlıq pánler hám klasslar kesiminde mektep sabaqlıqlarınıń elektron variantları da málimleme-resurs orayı kompyuterlerine jaylastırılǵan. Málimleme-resurs orayınıń kitap fondın jáne de bayıtıw maqsetinde usı jıl da gazeta- jurnallarǵa 7 000 000 (jeti million) sum, 75 000 000 sumǵa kitaplar satıp alıw rejelestirilgen.
Baspasóz konferenciyada ǵalaba xabar quralları wákilleri ózlerin qızıqtırǵan sorawlarına juwaplar aldı. 
