9-aprel kúni Qaraqalpaqstan Respublikası pedagogikalıq sheberlik orayı Social-ekonomikalıq pánler metodikası kafedrası baslıǵı R.Bauetdinov tárepinen oraydıń professor-oqıtıwshıları ushın “Tariyx sabaqların oqıtıwda úlketanıwshılıqtıń áhmiyeti” atamasında oqıw-seminarı ótkerildi.
Seminarda tariyx sabaqlarında úlketanıw materiallarınan paydalanıw arqalı sabaqtıń sapası hám nátiyjeliligin arttırıw jolları haqqında keń túrde maǵlıwmatlar berildi. Úlketanıwshılıqtıń tek ǵana tariyx sabaqlarında hám basqa pán sabaqlarında da oqıwshılardıń sabaqqa qızıǵıwshılıǵan arttırıw, olarda óz watanına súyispenshiligin oyatıw hám milliy maqtanısh sezimlerin rawajlandırıwda áhmiyeti úlken ekenligi ayrıqsha atap ótildi.
Seminar “Joybar sabaǵı” formasında alıp barıldı. Qatnasıwshlar bes toparǵa bólinip tapsırmalar orınladı.
Toparlar belgilengen waqıt ishinde berilgen temalar kóleminde úlketanıw materialları haqqında maǵlıwmatlar jıynadı hám toplanǵan maǵlıwmatlardı analizlep olardı tariyx sabaqlarında nátiyjeli qollaw boyınsha óz usınısların berdi. Toparlar óz aymaqlarında jaylasqan tariyxıy estelikler, belgili insanlar, arxiv hújjetleri, virtual sayaxatlardı shólkemlestiriw sabaq mazmunın bayıtıp, oqıwshılardı sabaqqa tartıwda ayrıqsha áhmiyetli ekenligin atap ótti.
