#Ashıq_sabaq
☄️”Mektepke shekemgi, baslawısh hám arnawlı tálim metodikası” kafedra baslıǵı, docent B.Utemuratov tárepinen Baslwısh tálim kásiplik rawajlanıw (qánigeligin arttırıw) kursında “PIRLS tapsırmaları úlgilerin islep shıǵıw hám olar ústinde islew usılları” temasında ashıq sabaq ótkerildi.
✨PIRLS baǵdarlaması baslawısh 4-klass oqıwshılarınıń tekstti oqıw hám túsiniw dárejesin bahalawǵa qaratılǵan. Bul baǵdarlama baslawısh klass oqıwshılarınıń klass hám klastan tıs oqıwın bahalawda eki maqsetti: kórkem oqıw kónlikpesi menen informaciyalardı alıw hám paydalanıwǵa baǵdarlanǵan.
Sabaq barısında kórkem hám ilimiy-publicistikalıq tekstlerdi oqıwda oqıw kónlikpeleriniń tórt túri haqqında túsinik berildi.
Oqıwshılardıń teksttegi anıq kóriniste berilgen maǵluwmattı taba alıwın, juwmaq jasawın, maǵlıwmatlardı ulıwmalastıra alıwın qáliplestiriwde qollanılıwı kerek bolatuǵın texnologiya hám metodlar tıńlawshılar tárepinen ámeliy túrde orınlandı.
Sabaq dawamında tıńlawshılar teksttiń mazmunı, til ózgesheligi, dúzilisin talqılaw hám bahalaw, kórkem hám ilimiy-ǵalabalıq tekstleri ushın tapsırmalar tayarlaw texnologiyasınan nátiyjeli paydalandı. PIRLS tapsırmalar úlgileri islep shıǵıldı hám olar ústinde nátiyjeli islew usılları qollanıldı.
