Qaraqalpaqstan Respublikası Pedagogikalıq sheberlik orayında “Mektepke shekemgi, baslawısh hám arnawlı tálim metodikaları” kafedrasınıń aǵa oqıtıwshısı Tumaris Aymuxammedova tárepinen “Balalarǵa hár túrli usılda súwret salıwdı úyretiw” temasında ashıq sabaq ótildi.
Sabaq balalardıń kózqarasın keńeytiw, olardıń estetikalıq talǵamı hám kórkemlik kónlikpelerin rawajlandırıwǵa qaratılǵan túrli innovaciyalıq metodlar tiykarında alıp barıldı.
Barmaq izleri járdeminde súwret jaratıw, shablonlardan paydalanıw, puantilizm, klyaksografiya hám súwret salıwdıń basqa da dástúriy emes texnikalar arqalı arqalı tıńlawshılarǵa ámeliy shınıǵıwlar kórsetildi. Bul usıllardı mektepke shekemgi bilimlendiriw shólkemleri tárbiyashıları jaqsı ózlestirip, ózleriniń pedagogikalıq iskerliginde qollanıw boyınsha pikirlerin bildirdi.
Ashıq sabaqqa Pedagogikalıq sheberlik orayınıń direktorı Venera Bekmuratova hám kafedra professor-oqıtıwshıları qatnasıp, sabaqtıń shólkemlestiriliwine joqarı baha berildi hám olar tárepinen bunday ashıq sabaqlar tek ǵana kásiplik bilim hám kónlikpelerdi bayıtıwǵa emes, al tárbiyashılarda jańa ideyalardı qáliplestiriwge de xızmet etetuǵını ayrıqsha atap ótildi.
Sabaq juwmaǵında tıńlawshılar pikir-usınısları menen bólisip, kúndelikli ámeliyatta qollanıw múmkin bolǵan paydalı kózqaraslarǵa iye boldı.
