Qaraqalpaqstannıń omırtqalı haywanat dúnyası temasında sheberlik sabaǵı ótkerildi

Qaraqalpaqstan Respublikası Pedagogikalıq sheberlik orayında Qaraqalpaq mámleketlik universiteti Biologiya fakultetiniń dekanı, Ózbekstan Zoologlar jámiyetiniń aǵzası, biologiya ilimleriniń doktorı, professor M.Jumanov tárepinen ruwxıy-aǵartıwshılıq isleri boyınsha direktor orınbasarlarınıń qánigeligin arttırıw kursı tıńlawshıları ushın “Qaraqalpaqstannıń omırtqalı haywanat dúnyası” atamasında sheberlik sabaǵı shólkemlestirildi. Sheberlik sabaǵı dawamında Qaraqalpaqstan Respublikasınıń geografiyalıq ózgeshelikleri, tábiyǵıy aymaqları hám haywanat dúnyasınıń hár qıylılıǵı haqqında tolıq maǵlıwmatlar berildi. Atap ótilgenindey, Qaraqalpaqstan Respublikasınıń ulıwma maydanı 165,6 mıń kvadrat kilometrdi qurap, Ózbekstan aymaǵınıń 37,3 procentin ieleydi. Respublika úsh tiykargı geografiyalıq aymaqtan ibarat: Arqa-Batıs Qızılqum aymaǵı; Ústirt platosı; Ámiwdáryanıń tómengi aǵısı aymaǵı. Shınıǵıw dawamında usı aymaqlardıń tábiyǵıy sharayatı, relyefi hám haywanat dúnyasınıń qáliplesiwindegi ornı haqqında maǵlıwmatlar berildi. Sonday-aq, haywanlardıń azıqlanıw túrleri haqqında da sóz etildi. Olardıń azıqlanıwına qaray tiykarǵı toparlarǵa ajıratılıwı, biologiyalıq ózgeshelikleri hám tábiyattaǵı áhmieti haqqında túsinikler berildi. Sabaq dawamında Qaraqalpaqstan aymaǵındaǵı qorǵalatuǵın tábiyǵıy aymaqlar hám olardıń biologiyalıq kóp túrlilikti saqlawdaǵı ornı ayrıqsha atap ótildi. Sonnan: Tómengi Ámiwdárya mámleketlik biosfera rezervatı; “Aralboyı” milliy tábiyat baǵı; “Aralqum” milliy tábiyat baǵı; Qubla Ústirt milliy tábiyat baǵı; “Sudoche-Aqpetkey” mámleketlik buyırtpa qorıqxanası; “Saygaqshi” kompleksli (landshaft) buyırtpa qorıqxanası; Barsakelmes mámleketlik buyırtpa qorıqxanası. Sabaqta haywanatlar dúnyasınıń biologiyalıq kóp túrliligin saqlaw, joǵalıp baratırǵan túrlerdi qorǵaw hám keleshek áwladlarǵa salamat ekologiyalıq ortalıqtı miyras etip qaldırıw búgingi kúnniń áhmiyetli wazıypalarınan biri ekeni ayrıqsha atap ótildi. Sheberlik sabaǵınıń juwmaǵında tıńlawshılarǵa haywanatlar dúnyasın saqlaw, tábiyǵıy baylıqlardan aqılǵa uǵras paydalanıw hám jas áwladtıń ekologiyalıq mádeniyatın arttırıw boyınsha ámeliy usınıslar berildi.   –