BILIMLENDIRIWDE ASHÍQ-AYDÍNLÍQ – KORRUPCIYAǴA QARSÍ KEPILLIK

Qaraqalpaqstan Respublikası Pedagogikalıq sheberlik orayında korrupciyanıń aldın alıw, jámiyette hadallıq hám ashıq-aydınlıq principlerin bekkemlew maqsetinde “Korrupciyanıń aldın alıwda bilimlendiriwdiń roli” atamasında májilis ótkerildi. Ilajǵa Qaraqalpaqstan Respublikası Ádillik ministrligi Nókis qalalıq yuridikalıq xızmet kórsetiw bóliminiń baslıǵı Tumur Utemuratov hám bas yuriskonsult Artıqbay Seytnazarov, sonday-aq, Pedagogikalıq sheberlik orayınıń professor-oqıtıwshıları hám tıńlawshıları qatnastı. Ilajdan gózlengen tiykarǵı maqset — bilimlendiriw sistemasında korrupciyaǵa mawasasız qatnastı qáliplestiriw, pedagog xızmetkerler hám tıńlawshılardıń huqıqıy sawatlılıǵın arttırıw, korrupciyalıq jaǵdaylardıń kelip shıǵıwına sebep bolıwshı faktorlardı túsindiriw jáne bilimlendiriw procesinde nızamlılıq, qalıslıq, ádillik hám ashıq-aydınlıq principlerine ámel etiliwin támiyinlewden ibarat. Sonday-aq, korrupciyalıq huqıqbuzarlıqlardıń aldın alıw, olardıń unamsız aqıbetlerin túsindiriw, hár bir xızmetkerde jeke juwapkershilik hám kásiplik hadallıqtı bekkemlew jáne korrupciyaǵa qarsı gúresiwde jámiyetshiliktiń belsendiligin arttırıwǵa ayrıqsha itibar qaratıldı.