Qaraqalpaqstan Respublikası Pedagogikalıq sheberlik orayında bilimlendiriw sistemasında korrupciyanıń aldın alıw, nızamlılıq, ádillik hám ashıq-aydınlıq principlerin bekkemlewge qaratılǵan “Korrupciyaǵa qarsı gúres — aydın keleshegimiz tiykarı” atamasında dógerek sáwbeti shólkemlestirildi. Ilaj dawamında korrupciyanıń mazmun-mánisi, onıń jámiyet hám bilimlendiriw sistemasınıń rawajlanıwına unamsız tásiri, sonday-aq, korrupciyalıq jaǵdaylardıń aldın alıwdıń huqıqıy tiykarları haqqında tolıq maǵlıwmat berildi. Oraydıń “Social-ekonomikalıq pánler metodikası” kafedrası oqıtıwshıları hám oraydıń yuriskonsulti Baxtiyar Saypov tárepinen tıńlawshılarǵa korrupciyaǵa qarsı gúresiw, mápler soqlıǵısıwınıń aldın alıw, xızmet wákilliklerinen jeke mápler jolında paydalanıwdıń huqıqıy aqıbetleri boyınsha túsinikler berildi. Sonday-aq, pedagog xızmetkerler hám tıńlawshılardıń huqıqıy sawatlılıǵın arttırıw, kásiplik hadallıq hám jeke juwapkershilikti bekkemlew, bilimlendiriw procesinde nızamlılıq, ádillik hám ashıq-aydınlıqtı támiyinlew máselelerine ayrıqsha itibar qaratıldı. Ilaj sońında qatnasıwshılar ózlerin qızıqtırǵan sorawlarǵa juwaplar alıp, tema boyınsha pikir-usınısların bildirdi.





