2026-jıl 19-noyabr kúni Qaraqalpaqstan Respublikası Pedagogikalıq sheberlik orayında ullı ilimpaz, eki márte Nobel sıylıǵınıń laureatı Mariya Sklodovskaya-Kyuri tuwılǵan kúniniń 159 jıllıǵı múnásibeti menen “Ilimge baǵıshlanǵan ómir” atamasında ilaj ótkerildi. Ilajda oraydıń Anıq hám tábiyiy pánler metodikası kafedrası baslıǵı, docent G.Allaxova, fizika páni aǵa oqıtıwshıları J.Jamalova hám P.Daryabaevalar hám de fizika páni kurs tıńlawshıları qatnastı. Ilaj dawamında qatnasıwshılarǵa Mariya Sklodovskaya-Kyuridiń ómir jolı, ilimiy jumısı, fizika hám ximiya ilimleriniń rawajlanıwına qosqan úlken úlesi haqqında tolıq maǵlıwmat berildi. Mariya Sklodovskaya-Kyuri (1867-1934) tariyxta eki márte Nobel sıylıǵına miyasar bolǵan birinshi hám birden-bir hayal ilimpaz sıpatında tán alınadı. Onıń ilimiy izleniwleri nátiyjesinde poloniy hám radiy ximiyalıq elementleri ashılǵan. Sonday-aq, “radioaktivlik” ataması ilimge kirgizilip, radioaktivlik qubılısınıń fizikalıq hám ximiyalıq qásiyetleri tereń úyrenilgen. Ilimpazdıń izertlewleri medicinada nur terapiyasınıń dáslepki tiykarları jaratılıwına da xızmet etken. Ilajda ullı ilimpazdıń ilimge sadıqlıǵı, tınımsız izleniwleri hám isenimliligi búgingi áwlad ushın da ibrat mektebi ekenligi ayrıqsha atap ótildi.





