Mámleketimizdiń siyasiy turmısı, ǵárezsizlik jılnamasında 8-dekabr sánesi Ózbekstan Respublikasınıń Konstituciyası qabıl etilgen kún hár jılı xalqımızdıń ómirindegi eń bir umıtılmas kún sıpatında óz ornı hám áhmiyetine iye milliy bayramlar qatarında belgilenip kelinbekte. Qaraqalpaqstan Respublikası pedagoglardı jańa metodikalarǵa úyretiw milliy orayınıń “Social-ekonomikalıq pánler metodikası” kafedrası professor-oqıtıwshıları tárepinen «Konstituciya-puxaralardıń huqıq hám erkinlikleriniń tiykarǵı kepili» atamasında ushırasıw keshesi bolıp ótti. Bayram ilajı Ózbekstan hám Qaraqalpaqstan Respublikalarınıń mámleketlik gimnleri menen baslandı. Bayanatshılar tárepinen Konstituciyamız insan huqıqları menen erkinlikleriniń kepili, Jańa Ózbekstanda insan qádiri hám insan mápi hámme nárseden ústin ekenligi atap ótildi. Konstituciya qabıl etilgennen keyingi jıllar dawamında erisilgen jetiskenlikler, atap aytqanda, insan huqıqları hám erkinlikleriniń támiyinleniwi, mámleketlik basqarıwdıń eń nátiyjeli mexanizmleriniń engiziliwi, puqaralıq jámiyeti tiykarlarınıń payda bolıwı hám rawajlanıwı, erkin bazar qatnasıqlarına ótiw sıyaqlı jetiskenlikler tikkeley Bas nızamımız hám onıń tiykarında qabıl etilgen nızamlardıń izbe-izlik penen ámelge asırılıwı nátiyjesinde qolǵa kirgizildi. 2023-jıl 30-aprel sánesinde ulıwma xalıqlıq Referendum bolıp ótti. Arzıw niyetlerimiz, qálewlerimiz inabatqa alınǵan halda tayarlanǵan jańa redakciyadaǵı Konstituciyamızdı puqaralardıń 90,21 procenti jaqlap dawıs berdi. Jańa redakciyadaǵı Konstituciya 2023-jıl 1-maydan kúshke kirdi. 6 bólim, 27 bap hám 155 statyadan ibarat bas Nızamımız ózinde xalqımızdıń arzıw hám niyetlerin haqıyqıy mánide sáwlelendirdi dewge tolıq haqımız bar.
Atap aytatuǵın bolsaq, hámmemiz ushın ullı bolǵan oqıtıwshılardıń statusı haqqında, ata-analardıń perzentleri, perzentlerdiń ata-analar aldındaǵı minnetleri, mámleketttiń minnetlemeleri hám ǵamxorlıǵı, hámme ushın muqaddes bolǵan shańaraq, erli zayıplar arasında nekeden ótiw, atadan balaǵa ótip kiyatırǵan milliy qádiriyatlar, úrip-ádetlerdi qásterlep saqlaw hám basqalar orın alǵan. Eń áhmiyetlisi, endi reformalarımız jolınan hesh qashan artqa qaytpaymız, “insan – jámiyet – mámleket”, degen jańa sistema tiykarında tek hám tek ǵana aldıǵa qarap baramız” – degen sózlerin atap ótiw orınlı. Ulıwmalastırıp aytqanda erkinlik hám baxtımız tımsalı sanalǵan tiykarǵı Nızamımızdıń hár bir statyası ózinde joqarı insanıylıq principlerin jámlegenligi hám xalıqaralıq ulıwmalıq insan huqıqları haqqındaǵı normalarǵa sáykes keliwi menen áhmiyetli.
