Qaraqalpaqstan Respublikasına miyneti sińgen xalıq bilimlendiriw xızmetkeri Keńesbay Dawletiyarovtıń qaytıs bolıwı múnásibeti menen kewil bildiriw

Qaraqalpaqstan Respublikası pedagoglardı jańa metodikalarǵa úyretiw milliy orayı awır joǵaltıwǵa ushıradı Bilimlendiriw tarawınıń pidayısı, Qaraqalpaqstan Respublikası Xalıq bilimlendiriw aǵlası, Qaraqalpaqstan Respublikasına miyneti sińgen xalıq bilimlendiriw xızmetkeri, Fizika-matematika ilimleriniń kandidatı, Keńesbay Dawletiyarov 70 jasında qaytıs boldı. K.Dawletiyarov 1954-jılı Shımbay rayonında tuwıldı. Ol orta mektepten soń Qaraqalpaq mámleketlik pedagogikalıq institutın tabıslı tamamlap, óziniń dáslepki miynet jolın Qaraqalpaq mámleketlik pedagogika institutında dástúrshi bolıp jumıs islewden baslaydı. Ol 2001-jılı K.Ubaydullaev atındaǵı pedagog kadrlardı qayta tayarlaw hám qánigeligin arttırıw institutında kafedra baslıǵı, direktor orınbasarı, ómiriniń aqırǵı kúnlerine shekem Qaraqalpaqstan Respublikası pedagoglardı jańa metodikalarǵa úyretiw milliy orayınıń «Anıq hám tábiyiy pánler metodikası» kafedrası baslıǵı lawazımında jumıs isledi. Ol qaysı lawazımda islese de, ózin miynetsúygish, tereń bilimli, istiń kózin biletuǵın sheber shólkemlestiriwshi sıpatında tanıta bildi hám xalqımız arasında úlken húrmet-izzetke iye boldı. Kenesbay Dawletiyarov tıńlawshılardıń mámleketlik bilimlendiriw standartları talapları dárejesinde bilim alıwı, bilim, kónlikpe hám uqıplılıqların tolıq ózlestiriw ushın jeterli sharayattı jaratıp beriwde óz úlesin qosıp, óziniń shólkemlestiriwshilik uqıbı, miynet súygishligi, talapshańlıǵı menen kózge túsip, kásiplesleri arasında úlken abırayǵa eristi. Onıń islegen miynetleri húkimetimiz tárepinen ılayıqlı bahalanıp «Qaraqalpaqstan Respublikasına miyneti sińgen bilimlendiriw xızmetkeri», «Ózbekstan hám Qaraqalpaqstan Xalıq bilimlendiriw aǵlası» kókirek nıshanı menen sıylıqlandı. Xalqımızdıń iygiligi ushın ayanbay miynet etken qádirli insan, Keńesbay Dawletiyarovtıń jarqın esteligi kásiplesleri hám shákirtleri yadında máńgi saqlanıp qaladı. Qaraqalpaqstan Respublikası pedagoglardı jańa metodikalarǵa úyretiw milliy orayı jámááti