#KRK FILOLOGIYA PÁNLERI MUǴALLIMLERINIŃ KÁSIPLIK KOMPETENCIYALARÍ RAWAJLANDÍRÍLMAQTA

Respublikamızdaǵı tayanısh mekteplerde filologiya pánleri (ana tili hám ádebiyatı, ózbek tili hám tuwısqan tiller) baǵdarı boyınsha gezektegi “Kásiplik rawajlanıw kúni” (KRK) ilajları shólkemlestirildi. Ilajlar sheńberinde pedagoglar ushın “Pedagogikalıq proceste jasalma intellektten paydalanıwdıń etikalıq hám huqıqıy tiykarları” atamasında sabaqlar ótkerildi. Sabaqlar dawamında jasalma intellekt texnologiyalarınan bilimlendiriw procesinde durıs, nátiyjeli hám juwapkershilik penen paydalanıw, pedagogikalıq xızmette júzege keliwi múmkin bolǵan ádep-ikramlılıq hám huqıqıy máseleler dodalandı. Atap aytqanda, sabaqtıń tiykarǵı basqıshında jasalma intellektten durıs paydalanıw principleri, 5 ádep-ikramlılıq koncepciya, qáwipsizlikke qáwip tuwdırıwshı 4 túrdegi qáwip-qáter hám jasalma intellektti pedagogikalıq jumısqa engiziw boyınsha 3 mashqalalı jaǵday (keys) ústinde islewge ayrıqsha itibar qaratıldı. Sonday-aq, jumısshılar jasalma intellektten paydalanıwda málimleme qáwipsizligin támiyinlew, jeke maǵlıwmatlardı qorǵaw, avtorlıq huqıqına ámel etiw, akademiyalıq hadallıq hám pedagogikalıq juwapkershilik máseleleri boyınsha bilimlerin bekkemledi. Ámeliy shınıǵıwlar arqalı pedagoglar jasalma intellekt imkaniyatlarınan sabaqlardı rejelestiriw, oqıw materialların tayarlaw hám bilimlendiriwdiń sapasın arttırıwda aqılǵa uǵras paydalanıw boyınsha zárúr kónlikpelerge iye boldı.