Paytaxtımızdaǵı 37-sanlı ulıwma orta bilim beriw mektebinde Qaraqalpaqstan Respublikası Pedagogikalıq sheberlik orayı “Pedagogika, psixologiya hám tálim texnologiyaları” kafedrası baslıǵı, professor Marat Utepbergenov basshılıǵında mámleketlik grant tiykarında ámelge asırılıp atırǵan “Zorlıqqa qarsı aǵartıwshılıq” joybarı sheńberinde oqıwshı-jaslardıń qatnasıwında seminar-trening shólkemlestirildi. Ilajda joybar basshısı, professor Marat Utepbergenov qatnasıp, joybardıń tiykarǵı maqseti, wazıypaları hám onıń áhmiyeti haqqında sóz etti. Sonday-aq, oqıwshı-jaslarǵa tema boyınsha zárúr túsinik hám usınıslar berdi. Seminar-trening dawamında joqarı klass oqıwshılarına jınısıy tárbiya hám reproduktivlik salamatlıq, erte hám májbúriy nekeniń aldın alıw, zorlıqtıń túrli kórinisleri, sonıń ishinde, ekonomikalıq hám psixologiyalıq basımnıń unamsız aqıbetleri haqqında tolıq túsinikler berildi. Sonday-aq, jaslardıń huqıqıy sawatlılıǵın arttırıw, óz huqıqların biliw hám qorǵaw, zorlıq jaǵdaylarına mawasasız múnásibetti qáliplestiriw máselelerine ayrıqsha itibar qaratıldı. Seminar-trening dawamında óz-ara pikir-usınıslar almasılıp, qatnasıwshılar ózlerin qızıqtırǵan sorawlarǵa qánigeden juwap aldı. 












