Respublikamızda alıp barılıp atırǵan bililmlendiriwdegi reformalardı birgelikte ámelge asırıw, oqıtıwshılardı jámlesken kúshke aylandırıw hámde bar bolǵan mashqalalardı talqılaw hám orlardıń sheshimi boyınsha anıq usınıslar islep shıǵıw maqsetinde gúzgi demalıs waqtında oqıtıwshılar qatnasında oqıw hám ushırasıwlar ótkerilmekte.
Qaraqalpaqstan Respublikası Mektepke shekemgi hám mektep bilimlendiriw ministrligi, Nókis qalalıq Mektepke shekemgi hám mektep bilimlendiriw bólimi hám Pedagoglardı jańa metodikalarǵa úyretiw milliy orayı tárepinen 2023-jıl 7-noyabr kúni baslawısh tálim, anıq hám tábiyiy pánler, ana tili hám ádebiyatı baǵdarında 46-sanlı ulıwma orta bilimlendiriw mektebinde trening hám ashıq sáwbetlesiwler alıp barıldı. Bul ushırasıwlarda pánlerdi oqıtıwda zamanagóy metodlardan nátiyjeli paydalanıw, sabaq nátiyjeliligin arttırıwda informaciyalıq texnologiyalardan nátiyjeli paydalanıw, oqıw baǵdarlama hám sabaqlıqlardı ele de jetilistiriw boyınsha pikir hám usınıslar berildi.
Mektepke shekemgi, baslawısh hám arnawlı tálim metodikaları kafedrası baslıǵı Utemuratov Bayrambay “Aldıńǵı tájiriybeler negizinde tayarlanılǵan sabaqlıq tiykarınd oqıtıw metodikası” temasında trening alıp bardı. Treninge Nókis qalalıq Mektepke shekemgi hám mektep bilimlendiriw bólimine qaraslı ulıwma orta bilimlendiriw mektepleriniń baslawısh klass metodikalıq birlespe basshıları qatnastı. Treningde 2023-2024-oqıw jılında baslawısh klaslar ushın tayarlanılǵan sabaqlıqlar, ondaǵı temalardı oqıwshılarǵa jetkerip beriwde qollanıwı kerek metodlar haqqında túsiniker berildi. Búgingi kúndegi zamanagóy bilimlendiriw dúnyadaǵı ózgerislerge beyimlesiwsheń, hár qıylı mashqala hám tosıqlarǵa tayar turatuǵın maman qánigelerdi jetilistiriw wazıypaları kórsetip ótildi.
