16-aprel kúni Pedagogikalıq sheberlik orayınıń ” Mektepke shekemgi, baslawısh hám arnawlı tálim metodikaları” kafedrasınıń aǵa oqıtıwshısı Gulzar Baytileuova tárepinen “Mektepke shekemgi bilimlendiriw tárbiyashıların úzliksiz oqıtıw kursı” sheńberinde “Origami, tangram, lego, pazl, sanama hám basqa da qurallar arqalı balalar dóretiwshiligin rawajlandırıw” atamasında ashıq sabaq ótkerildi.
Ashıq sabaq mektepke shekemgi bilimlendiriw shólkemindegi qurıw-jasaw hám konstrukciyalaw orayı mısalında ótkerilip, ol jerde balalardıń dóretiwshilik oylawın rawajlandırıwǵa xızmet etetuǵın túrli oyınlar hám didaktikalıq qurallar ámeliy tárizde kórsetildi.
Origami – qollardı sheberlikke, qıyaldı erkinlikke jetelese,
Tangram – formalar arqalı pikirlewdi sheberlestiredi,
Lego hám konstruktorlar – kishi qollarda úlken ideyalardı quradı,
Pazl hám sanaw shópleri – logikalıq pikirlew, mashqala sheshiw, dıqqat-itibar hám sabırlılıqtı qáliplestiredi.
Búgingi ashıq sabaqta qatnasıwshılarǵa usı qurallardıń balalar rawajlanıwındaǵı ornı, olar arqalı matematika, injenerlik, kózqaras hám sóylesiw kónlikpeleriniń qalay qáliplesiwi haqqındaǵı tereń teoriyalıq hám ámeliy bilimler jetkerildi. Bas qatırıwshı oyınlar tek ǵana oyın emes, al balalardıń miyin “gimnastika” qılıwshı qurallar ekeni atap ótildi.
Usı sabaq arqalı tárbiyashılar origami hám basqa da dóretiwshilik jumıslar arqalı balalardıń tek ǵana dóretiwshiligin emes, al olardıń analitikalıq pikirlewi, itibarı, eslep qalıw qábileti hám sociallıq kónlikpelerin rawajlandırıw múmkin ekenligin ámelde kórdi.
Dóretiwshilik penen pikirleytuǵın bala – keleshek injeneri, kórkem óner hám oylap tabıwshısı.
