Korrupciyaǵa qarsı gúres- jarqın keleshegimiz tiykarı

Ózbekstan Respublikası Prezidenti Administraciyası hám Ministrler Kabinetiniń tiyisli tapsırmaları jáne Mektepke shekemgi hám mektep bilimlendiriwi ministrliginiń 2025-jıl 28-oktyabrdegi 412-sanlı buyrıǵına muwapıq, sistemada korrupciyalıq jaǵdaylardıń aldın alıw maqsetinde Qaraqalpaqstan Respublikası Pedagogikalıq sheberlik orayında «Korrupciyaǵa qarsı gúres- jarqın keleshegimiz tiykarı» atamasında ashıq sáwbet hám ashıq esikler kúni ótkerildi. Oǵan Qaraqalpaqstan Respublikası Adillik  ministrliginiń  bas máslahatshisi M. Xojaqmedova, Ózbekstan “Adolat” SDP Qaraqalpaqstan Respublikası Keńesi baslıǵınıń orınbasarı Sh.Tóreshova oray kafedra baslıqları, professor-oqıtıwshılar hám tıńlawshılar qatnastı. Ilajdı «Social-ekonomikalıq pánler metodikası» kafedrası  aǵa  oqıtıwshısı Adilbay Shırazov basqarıp bardı. Ushırasıwda atap ótilgenindey, hár qanday rawajlanıwdıń tamırına balta uratuǵın illetlerdiń biri korrupciya bolıp esaplanadı. Elimizde usınday illetlerge qarsı gúresiw, olardıń aldın alıw máselesine ayrıqsha itibar qaratılıp, bul baǵdardaǵı nızamshılıq bazası da jetilistirilmekte. Usı tiykarda puqaralardıń juwapkershiligi de arttırılmaqta. Usı jıldıń 5-mart kúni mámleketimiz basshısı Korrupciyaǵa qarsı gúresiw milliy keńesiniń májilisinde qatnasıp, «Korrupciya – reformalar jolındaǵı eń úlken tosıq» ekenligin atap ótken edi. Ilajda dámegóylik, para alıw hám beriw, belgili bir sawǵa esesine adamlardıń huqıqları menen máplerine qarsı háreket etiw ámeldegi nızamshılıq tiykarında qadaǵan etiletuǵınlıǵı, eger usınday jaǵdaylar anıqlanatuǵın bolsa, jınayıy juwapkershilikke tiykar bolatuǵınlıǵı anıq mısallar menen atap ótildi. Ushırasıwda tarawlarda korrupciyalıq jaǵdaylarǵa qarsı gúresiw baǵdarında ámelge asırılıp atırǵan huqıqıy-operativ ilajlardan tayarlanǵan videorolik qatnasıwshılar názerine usınıldı.