2026-jıl 3-mart kúni shólkemlestirilgen press-tur sheńberinde ǵalaba xabar qurallarınıń wákilleri Nókis qalasındaǵı 6-sanlı ulıwma orta bilim beriw mektebiniń jumısı menen jaqınnan tanıstı. Press-tur dawamında bilimlendiriw mákemesinde “Kásiplik rawajlanıw kúni” hám “Kásiplik rawajlanıw saatı” ilajlarınıń shólkemlestiriliwi, metodikalıq jumıslar procesi hám pánler kesiminde ótkerilip atırǵan ashıq sabaqlar kórsetildi. Processlerde oqıtıwshılardıń kásiplik sheberligin arttırıw, aldınǵı pedagogikalıq qatnaslardı ámeliyatqa engiziw hám bilimlendiriwdiń sapasın támiyinlewge qaratılǵan jumıslar hár tárepleme sáwlelendirildi. Sonday-aq, filologiya baǵdarındaǵı sabaqlar, pedagoglar menen ashıq pikirlesiwler hám “Xalqım dana desem bolar” dógereginiń jumısı ǵalaba xabar quralları wákillerinde úlken qızıǵıwshılıq oyattı. Bul press-tur bilimlendiriw mákemesinde ámelge asırılıp atırǵan sistemalı reformalar hám professional rawajlanıw processlerin keń jámiyetshilikke jetkeriw imkaniyatın berdi.
