Mektepke shekemgi, baslawısh hám arnawlı tálim metodikaları kafedrası docenti G.YUsupovanıń baslaması menen tıńlawshılardıń sabaqtan bos waqıtların mazmunlı shólkemlestiriw, olardıń ruwxıy-aǵartıwshılıq potencialın arttırıwǵa qaratılǵan “Zamanagóy baslawısh klass muǵallimleri” atamasındaǵı tańlaw ótkerildi.
Tańlawda 6 baslawısh topardan 5 tıńlawshı qatnasıp, óz bilim, talant hám dóretiwshilik qábiletlerin kórsetti.
Tańlaw 3 basqıshta ótkerildi.
Tańlawdıń eń qızıqlı basqıshı – “Biz korrupciyaǵa jol qoymaymız!” súreni astında jaratılǵan saxnalıq kórinis boldı. Tıńlawshılar korrupciya mashqalasına baǵıshlanǵan scenariy arqalı hadallıq, ádillik hám kásipke sadıqlıq ideyaların tásirsheń túrde saxnalastırıp, hámmede úlken tásir qaldırdı.
Tańlaw juwmaǵında tóreshiler quramı barlıq toparlardıń belsendiligi, kreativ kózqarası hám jámáátlik ruwxın joqarı bahalap, nominaciyalar menen sıylıqlandı.
Bul tańlaw tek ǵana bilim hám dóretiwshilikti emes, al jámiyette hadallıq principlerin bekkemlewge xızmet etken haqıyqıy tárbiyalıq ilaj sıpatında este qaldı.
