📚Qoraqalpog‘iston Respublikasida «Yil o‘qituvchisi» tanlovining uchinchi bosqichi boshlandi

Qoraqalpog‘iston Respublikasi  Pedagogik mahorat markazida  “Yil o‘qituvchisi” tanlovining uchinchi bosqichi tantanali ravishda boshlandi. Ochilish marosimida ishtirokchilarga tanlov sinovlarini o‘tkazish tartibi, baholash mezonlari hamda nizom talablari yuzasidan batafsil ma’lumot berildi. Shundan so‘ng ochiqlik va shaffoflik tamoyillari asosida qur’a tashlash jarayoni o‘tkazilib, pedagoglarning tanlov sinovlaridagi ishtirok ketma-ketligi belgilandi.  Joriy yilning 28–30-iyul kunlari o‘tkaziladigan ushbu bosqichda respublikaning 208 ta tuman va shahridan 416 nafar sara pedagog o‘zining kasbiy mahorati, bilim salohiyati hamda zamonaviy pedagogik yondashuvlarini namoyon etadi. Tanlovda Qoraqalpog‘iston Respublikasi  sharafini 34 nafar pedagog himoya qilmoqda. Ular ta’lim sifatini yanada yuksaltirish, ilg‘or tajribalarni ommalashtirish va kasbiy salohiyatini namoyon etish yo‘lida o‘zaro bellashadilar.  Tanlov yakunlariga ko‘ra, har bir tuman va shahardan bittadan, jami 208 nafar pedagog g‘olib deb e’tirof etiladi. Vazirlar Mahkamasining 264-son qaroriga muvofiq, g‘oliblarning har biri bazaviy hisoblash miqdorining 1 400 baravari, ya’ni 576 million 800 ming so‘m miqdoridagi bir martalik pul mukofoti bilan taqdirlanadi. Barcha ishtirokchilarga tanlov sinovlarida omad, yuksak natijalar va munosib g‘alabalar tilaymiz!