Qaraqalpaqstan Respublikası Pedagogikalıq sheberlik orayınıń Pánlerdi rawajlandırıw bólimi tárepinen baslawısh klass muǵallimleri kurs tıńlawshıları ushın Edvard de Bononıń “Altı qalpaq” pikirlew metodınan paydalanıw temasında ámeliy master-klass shólkemlestirildi. Master-klass Nókis qalasındaǵı 31-sanlı ulıwma bilim beriw mektebiniń baslawısh klass muǵallimi, metodikalıq qollanbalardıń avtorı Gulnaz Toreniyazova alıp bardı. Sabaq dawamında qatnasıwshılarǵa Edvard de Bononıń “Altı qalpaq” metodınıń mazmun-mánisi, tiykarǵı principleri hám onı baslawısh klass sabaqlarında nátiyjeli qollanıw usılları haqqında maǵlıwmat berildi. Ámeliy bólimde tıńlawshılar toparlarǵa bólinip, metodtıń altı túrli pikirlew baǵdarına sáykes tapsırmalardı orınladı. Proceste olar mashqalaǵa túrli kózqarastan qatnas jasaw, maǵlıwmatlardı tallaw, unamlı hám unamsız táreplerin bahalaw, dóretiwshilik ideyalardı alǵa qoyıw hám juwmaqlar shıǵarıw boyınsha óz bilim hám kónlikpelerin sınaqtan ótkerdi. “Altı qalpaq” metodı oqıwshılardı bir másele boyınsha hár qıylı pikirlewge, óz kózqarasların erkin bildiriwge, basqalardıń pikirin tıńlawǵa hám tiykarlanǵan juwmaqlar shıǵarıwǵa baǵdarlaydı.
