Búgin Nókis qalasındaǵı «Aq quw» kompleksinde mektep oqıwshılarınıń ximiya pánine baylanıslı teoriyalıq bilimlerin hám ámeliy kónlikpelerin sınaqtan ótkeriwge qaratılǵan Ábiw Rayxan Beruniy atındaǵı III xalıqaralıq ximiya Olimpiadasınıń ashılıwına arnalǵan ilaj ótkerildi. Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı Olimpiada ashılıwı múnásibeti menen qutlıqladı. Atap ótilgenindey, sońǵı jılları húrmetli Prezidentimizdiń basshılıǵında tálim-tárbiya sistemasın xalıqaralıq standartlar tiykarında rawajlandırıw, jaslardı hár tárepleme bilimli etip kamalǵa keltiriw, olardı qollap-quwatlaw baǵdarında keń kólemli ámeliy ilajlar alıp barılmaqta. Elimizde úshinshi márte ótkerilip atırǵan xalıqaralıq ximiya Olimpiadası da mine usınday ilajlardıń ámeliy nátiyjesi esaplanadı. Olimpiada bellesiwleri jaslardıń qızıǵıwshılıǵı hám bilim, kónlikpelerin rawajlandırıwda, óz-ara doslıq qatnasıqların bekkemlewde áhmiyetli orın iyeleydi. Onda dúnyanıń 20 mámleketinen kelgen 120 dan aslam eń bilimli hám ziyrek jaslar bir hápte dawamında óz bilimlerin sınaqtan ótkeredi. Álbette, bul xalıqaralıq Olimpiada jaslardıń ximiya pánine bolǵan qızıǵıwshılıǵın ele de arttırıwǵa xızmet etedi hám aldaǵı oqıwlarında úlken motivaciya boladı. 
III xalıqaralıq ximiya Olimpiadasınıń ashılıwına arnalǵan ilaj bolıp ótti
Back To Top